जेष्ठ १३ गुल्मी:
गुल्मीको छत्रकोट गाउँपालिका -४ दिगाममा बृहत् रक्तदान कार्यक्रम सम्पन्न भएको छ ।
दिगाम युवा संजाल बुटवलको आयोजना तथा गुल्मी दिगाम रुपन्देही सम्पर्क समाज रुपन्देहीको सहआयोजनामा शनिबार एक दिने बृहत् रक्तदान कार्यक्रम सम्पन्न भएको हो ।
पानीको एक एक थोपा गरि जसरी समुन्द्र बन्छ त्यसरी नै गुल्मीको दिगामका नागरिकले एक एक थोपा रगत दान गरेका छन । रक्तदानले कसैको जीवनलाई मात्र नभई उसको घरबार पनि बचाउँछ।
स्वस्थ शरीर , मानसिक सन्तुलन ठिक , मलेरिया , क्षयरोग, जन्डिस, मधुमेह तथा एचआईभी एड्स नलागेका तथा कम्तीमा १८ वर्ष पूरा भइ ६० वर्ष ननाघेका र ४५ केजी तौल भएका व्यक्ति रक्तदान गर्न सक्षम हुन्छन् ।
बृहत् रक्तदान कार्यक्रममा छत्रकोट गाउँपालिका गुल्मी तथा वडा नं ४ को कार्यालय दिगाम र नेपाल स्वयंसेवी रक्तदाता समाज जिल्ला शाखा रुपन्देहीको समन्वय रहेको थियो ।
आदर्श माध्यमिक बिद्यालय छत्रकोट गाउँपालिका ४ दिगाममा भएको रक्तदान कार्यक्रममा १२५ युनिट रगत संकलन भएको छ।
रक्तदान कार्यक्रममा बोल्दै दिगाम युवा संजाल बुटवल बाट आउनुभएका भूपेन्द्र पन्थले दिगामलाई जन्मभूमि सम्झेर तथा कार्यक्षेत्रका हिसाबले अन्यत्र रहनुभएका दिगामका युवाहरूलाई एकत्रित गर्ने प्रयास स्वरुप दिगाम युवा संजाल गठन भएको स्मरण गराउनुभएको थियो ।
युवा संजालले दिगाममा मात्र नभएर देशका अन्य स्थानमा पनि विभिन्न सामाजिक कार्य गर्दै आएको उहाँको भनाई छ ।
दिगाममा शिक्षित व्यक्तिको संख्या वृद्धि भएपनि अझै रक्तदानको ज्ञान बारेमा प्रयाप्त जानकारी नभएकोले यहाँका नागरिकलाई रक्तदान गर्दा कमजोर भइन्छ भन्ने भ्रम हटाउनको लागि रक्तदान कार्यक्रमको आयोजना गरिएको नेपाल स्वयंसेवी रक्तदाता समाज जिल्ला शाखा रुपन्देहीका अध्यक्ष कृष्ण चौहान क्षत्रीले बताउनुभयो ।
रक्तदान गर्दा कतिपय मुटुजन्य रोगका समस्या र कतिपय मधुमेह जन्य रोग हरुबाट आफू सुरक्षीत छु भन्ने पत्ता लाग्ने उहाँको भनाई छ।
रक्तदान कार्यक्रममा छत्रकोट गाउँपालिका अध्यक्ष रामप्रसाद पाण्डेको प्रमुख आतिथ्यता रहेको थियो ।
यस्तै नेपाल स्वयंसेवी रक्तदाता समाज जिल्ला शाखा रुपन्देहीका अध्यक्ष कृष्ण चौहान क्षत्री तथा गाउँपालिकाकी उपाध्यक्ष साबित्रा ज्ञवालिको बिशेष आतिथ्यता रहेको थियो ।
छत्रकोट गाउँपालिका वडा नं ४ का वडाध्यक्ष गुणाकर ज्ञवाली , पुर्व वडाध्यक्ष डिलाराम न्यौपाने , मुक्तिनाथ सहकारीका अध्यक्ष रामकृष्ण न्यौपानेको आतिथ्यता रहेको कार्यक्रममा राहुल न्यौपानेले स्वागत मन्तव्य रहेको थियो ।
कार्यक्रमको संचालन भूपेन्द्र पन्थले गर्नुभएको थियो ।
