पौष २९ , गुल्मी ।
भोलिको माघे सङ्क्रान्तिका लागि बुटवल–पाल्पा सडक आज र भोलि बन्द नहुने भएको छ । भोलि माघे सङ्क्रान्ति परेकाले आज र भोलि २४ सै घण्टा सडक खुला गरिएको छ ।
सिद्धार्थ राजमार्ग अन्तर्गतको बुटवल–पाल्पा सडक खण्ड आज र भोलि दुई दिन बन्द नहुने भएको छ । पुस १६ गतेदेखि राति दैनिक ६ घण्टा बन्द भएको सडक आज र भोलि माघे सङ्क्रान्तिको अवसरमा बन्द नगर्ने निर्णय भएको पाल्पाका सहायक प्रमुख जिल्ला अधिकारी भक्तिसरा रानाले जानकारी दिनुभयो । यो सडकमा राति १० बजेदेखि बिहान ४ बजेसम्म अत्यावश्यक बाहेकका गाडी रोकेर सुरुङ निर्माणको काम हुँदै आएको छ ।
गएको १६ गतेदेखि एक सय दिनसम्मका लागि राति ६ घण्टा सडक बन्द गरिएको हो । तल्लो सिद्धबाबादेखि पाल्पाको दोभान चौकीसम्मको झण्डै ३ किलोमिटर सडक क्षेत्र पहिरोका कारण जोखिमयुक्त भएकाले सुरुङमार्ग बनाउने काम भैरहेको छ ।