जेठ २५ /साबित्रा पौडेल
गुल्मीको रुरु क्षेत्र गाउँपालिका २ ग्वादी भरेकमा रहेको भरेक आधारभूत विद्यालयले शुक्रबारको “बुक फ्री गुड फ्राइडे” अभियानलाई निरन्तरता दिएको छ।
विद्यालयले “बुक फ्री गुड फ्राइडे” अभियानको लागि गत वर्षको शैक्षिक सत्रको वैशाखदेखि नै वार्षिक कार्यतालिका बनाई विभिन्न सिर्जनात्मक कार्यक्रम सञ्चालन गर्दै आइरहेको छ ।
गाउँपालिकाले गतवर्ष प्रत्येक महिनाको सबै शुक्रबार यो कार्यक्रम सञ्चालन गरेको थियो भने यो वर्ष हरेक महिनाको दुईवटा शुक्रबार मात्रै यो कार्यक्रम सञ्चालन गर्दै आइरहेको विद्यालयका प्रधानाध्यापक लोकबहादुर मिदुन मगरले बताउनुभयो ।
जस अन्तर्गत विद्यालयले विद्यार्थीलाई आँपको अचार बनाउने कार्यक्रममा सहभागिता गराएको छ।
विद्यालयले विद्यालयमा अध्ययनरत कक्षा ४ देखि कक्षा ८ सम्मका विद्यार्थीहरूलाई आँपको अचार बनाउने कार्यक्रममा सहभागिता गराएको हो।
कार्यक्रममा विद्यार्थीहरूले सक्रियतापूर्वक सहभागी भई आँपको अचार बनाउन सिकेका विद्यालयका प्रधानाध्यापक मिदुन मगरले बताउनुभयो ।
।
आँपको अचार बनाउने कार्यक्रममा स्थानीय टिकामाया पचभैयााले प्रशिक्षण दिनुभएको बुक फ्री गुड फ्राइडेका संयोजक संगीत मगरले जानकारी दिनुभयो ।
यसभन्दा अगाडि विद्यालयले गुन्द्री बुन्ने, दाम्लो बाट्ने, लगायतका सिर्जनात्मक कार्यहरु सञ्चालन गरिसकेको छ।