साबित्रा पौडेल,मंसिर १८ गुल्मी।
गुल्मी लगायत यतिबेला देशका पश्चिमी क्षेत्रका केही ठाउँमा वर्षा र हिमपात भएको छ । लुम्बिनी,कर्णाली र सुदूरपश्चिम प्रदेशका पहाडी भेगमा हल्का वर्षासहित हिमपात भएको हो ।
मौसम बदली भएसँगै गुल्मी,पाल्पा,अर्घाखाँची, प्युठान लगायत देशभर नै चिसो बढेको छ। अहिले कोशी र मधेश प्रदेशबाहेक देशका अरु ठाउँमा मौसम बदली भएको छ ।
हाल देशमा पश्चिमी वायुको आंशिक प्रभाव रहेको छ। जसको कारणले मौसम बदली भएको मौसम पूर्वानुमान महाशाखाले जनाएको छ ।
यसैबिच पश्चिमबाट शुरु भएको बादल यतिबेला पूर्वतिर सरिरहेको छ।
आज दिनभरजसो मौसम बदली रहने तथा भोलिदेखि मौसममा सुधार आउने मौसमविदहरुले बताएका छन।