मंसिर १३, गुल्मी।
बुटवलको आम्दा अस्पतालमा सुरक्षा व्यवस्था कडा पारिएको छ ।
मंगलबार गुल्मीको सत्यवती गाउँपालिका वडा नम्बर ३ ठुलोलुम्पेककी ३५ वर्षीया भवानी राष्कोटी मगरको प्रसूतिपछि मृत्यु भएपछि आफन्तले अस्पतालका मेडिकल सुपेरिटेन्डेन डा. राजेन्द्र बस्यालमाथि कुटपिट गरेका थिए।
भवानीको मृत्युपछि आक्रोशित मृतकका आफन्तले क्षतिपूर्ति बापत ५० लाख माग गरेका थिए। त्यति ठूलो रकम दिने अवस्था नभएको बताएपछि मेसु बस्यालमाथि कुटपिट भएको अस्पतालका प्रशासन प्रमुख खगेन्द्र क्षेत्रीले बताए ।
सोमबार शल्यक्रियामार्फत पाँच किलोग्रामको बच्चा जन्माएकी भवानीलाई मंगलबार हृदयघात भएर मृत्यु भएको आम्दा अस्पातलले जनाएको छ।
अस्पतालमा सुत्केरीको मृत्यु भएपछि हतार–हतार शव जिम्मा लगाएर उम्किन खोज्नुको कारण बारे मृतकका आफन्तहरुले प्रश्न समेत उठाएका छन् ।
कुटपिटपछि घाइते भएका मेसु बस्यालको लुम्बिनी प्रादेशिक अस्पताल बुटवलमा उपचार भइरहेको छ । उनको आइसियूमा राखेर उपचार भइरहेको अस्पतालले जनाएको छ ।
अस्पतालका मेडिकल सुपेरिटेन्डेन डा. राजेन्द्र बस्यालमाथि कुटपिट भएपछि त्यहाँको सुरक्षा व्यवस्थालाई कडा पारिएको हो । अहिले अस्पताल परिसरमा बाक्लो रुपमा सुक्षाकर्मी परिचालन गरिएको छ भने मूल गेटबाट सर्वसाधारणलाई प्रवेश निषेध गरिएको छ ।
यसैबिच, नेपाल चिकित्सक संघ लुम्बिनीले आम्दा अस्पतालमा चिकित्सकमाथी कुटपिट गर्नेहरुलाई कारवाही गर्न माग गरेको छ ।
संघका अध्यक्ष डा. डिबि खत्री र महासचिव डा. सन्तोष पोखरेलले विज्ञप्ती जारी गर्दै संघका आजीवन सदस्य सिद्धार्थ बाल तथा महिला अस्पतालका मेडिकल सुपरिटेन्डेन्ट डा. राजेन्द्र बस्यालमाथी गुण्डागर्दी र दादागिरी शैलीमा भएको कुटपिटको निन्दा र भत्सर्ना गर्दै कुटपिटमा संलग्नहरुलाई कारवाहीको माग गरेका छन।