चैत ११ , गुल्मी।
आज पहाडी र हिमाली क्षेत्रमा फागु अर्थात् होली पर्व मनाइँदैछ । वसन्त ऋतुको आगमनसँगै आपसी मेलमिलाप र सद्भावनाको सन्देश लिई आउने फागु पर्व हर्षोल्लासका साथ एकआपसमा रङ र लोला खेली मनाउने गरिन्छ । आज काठमाण्डौ उपत्यकासहित पहाडी क्षेत्रमा र भोलि तराईका जिल्लामा होली मनाइन्छ ।
सरकारले आज पहाडी र हिमाली क्षेत्रमा सार्वजनिक बिदा दिएको छ । तराईमा भोलि सार्वजनिक बिदा छ ।
असत्यमाथि सत्यको विजयको प्रतीक, पारिवारिक एवम् सामाजिक एकताको पर्वका रुपमा फागु पर्व मनाउने प्रचलन छ । हिरण्यकशिपुले बहिनी होलिकालाई दन्किरहेको आगोमा छोरा प्रल्हादसहित पस्न लगाउँदा होलिका भष्म भएकी र भक्त प्रल्हाद भने सकुशल निस्केको प्रसङ्ग पुराणमा उल्लेख छ ।
शक्तिको दुरुपयोग गर्ने होलिका मारिएको भन्दै होलिकादहन भनी चीरदाह गरेर आपसमा रङ्ग, अबीर लगाएर खुशीयाली मनाएर होली खेल्ने परम्पराको शुरुवात भएको मानिन्छ ।
केही वर्षदेखि रङको पर्व होली सभ्य बन्दै आएको छ । केही वर्षअघिसम्म एक हप्ता अघिदेखि नै लोला हान्ने प्रवृत्ति थियो । तर चार, पाँच वर्ष यता फागु पर्वलाई अनुशासित भएर मनाउने गरिएको पाइन्छ । सडकमा काम विशेषले हिँड्नेलाई इच्छाविपरीत रङ र लोला हान्ने क्रम बन्द भएको छ ।
फागु पर्वको अवसरमा राष्ट्रपति, प्रधानमन्त्रीलगायत राजनीतिक दलका शीर्ष नेताहरुले शुभकामना दिनुभएको छ । मौलिक संस्कृतिको संरक्षण र संवर्द्धन गर्न यो पर्वले प्रेरणा प्रदान गर्ने शुभकामना सन्देशमा उल्लेख छ ।
प्रहरीले होलीलाई सभ्य तरिकाले मनाउन आग्रह गरेको छ । होहल्ला नगरी, जाँडरक्सी तथा लागुपदार्थ नखाई एकआपसमा रमाएर होली मनाउन प्रहरीले अनुरोध छ । होली लक्षित सुरक्षा योजना बनाएर कार्यान्वयन गरिएको, मोबाइल गस्ती तथा सादा पोशाकमा पनि प्रहरी खटिएका नेपाल प्रहरीका प्रवक्ता डीआईजी भीमप्रसाद ढकालले जानकारी दिनुभयो । मो
टरसाइकल चलाउँदा हेलमेट अनिवार्य लगाउन, तीन जना नचढ्न र जाँडरक्सी वा लागू पदार्थ खाएर गाडी नचलाउन पनि प्रहरीको आग्रह छ ।
यसैबिच,
जिल्ला प्रशासन कार्यालय गुल्मीले मर्यादित र सभ्य ढंगले फागु पर्व (होली) मनाउन आग्रह गरेको छ । जिल्ला प्रशासन कार्यालय गुल्मीले शुक्रबार सूचना जारी गर्दै होली मनाउने क्रममा कानून विपरितका गतिविधि नगर्न सर्वसाधारणलाई आग्रह गरेको हो ।
होलीमा जबर्जस्ती रंग दल्ने, लोला हान्ने, पानीले छ्याप्ने जस्ता अमर्यादित र उश्रृङ्खल गतिविधि गर्ने व्यक्तिलाई कडा कानूनी कारबाही गर्ने प्रशासनले चेतावनी दिएको छ ।
सहायक प्रमुख जिल्ला अधिकारी हरिप्रसाद गैरेले जारी गरेको सूचनामा होली मनाउने बहानामा कसैको इच्छाविपरित रंग दल्ने, लोला हान्ने, बाटोमा लुकेर बुटवालाई रंग लगाउने, बाटो अवरोध गरी सवारीसाधनबाट रकम असुल्ने लगायतका उश्रृङ्खल र अवाञ्छित किसिमका कुनै पनि गतिविधि नगर्न भनिएको छ ।
प्रशासनले मर्यादित र सभ्य ढंगले मनाएर होलीको धार्मिक एवं साँस्कृतिक महत्व सिद्ध गर्न अनुरोध गर्दै कानून विपरित कार्यहरु गरेको पाइएमा प्रचलित नियमअनुसार कारबाही गरिने समेत सुचनामा उल्लेख छ ।
साथै जिल्ला प्रशासन कार्यालय गुल्मीले रंगिन पर्व होलीको अवसरमा गुल्मी जिल्लाबासी सम्पुर्णमा सुख , शान्ती , समृद्धि र उत्तरोत्तर प्रगतिको कामना व्यक्त गरेको छ ।