चैत ७, गुल्मी ।
मदन भण्डारी राजमार्ग योजना कार्यलय , गुल्मी अन्तर्गत रिडी -तम्घास सडक खण्ड आजदेखी दैनिक १२ घण्टा बन्द गरिने भएको छ ।
मदन भण्डारी राजमार्गअन्तर्गत रिडीदेखि बलेटक्सारसम्मको २३ किलोमिटर क्षेत्रमा चट्टान फोर्न र ग्रेड मिलाउने कार्य भइरहेकोले आजदेखि ३० गतेसम्म सडक १२ घण्टा बन्द गरिएको हो ।
जिल्ला प्रशासन कार्यालय गुल्मीको चैत ४ बसेको बैठकको निर्णय अनुसार रिडी -तम्घास सडक खण्ड बन्द गरिने भएकाले वैकल्पिक मार्ग (पानी ट्यांकी – थोर्गा – स्यालपोखरी – स्यालबिसौना देखी रातामाटा सडक, पिपलनेटा – दिगाम हुँदै रिडी , लुम्छा – धरमपानी – दिगाम हुदै रिडी , घुम्ती चारपाला – खर्ज्याङ्ग हुँदै रिडी जाने सडक खण्ड) को प्रयोग गर्न जिल्ला प्रशासन कार्यालय गुल्मीले आग्र्ह गरेको छ ।
उक्त बाटोमा वैकल्पिक व्यवस्था हुनेगरी समयमै कार्यसम्पन्न गर्ने प्रयोजनको लागि आजदेखी चैत मसान्तसम्मको लागि बन्द गर्न लागिएको जिल्ला प्रशासन कार्यालय गुल्मीले जनाएको छ ।
सडक बिहान १० बजेदेखि दिउँसो ४ बजेसम्म र राती १० बजेदेखि बिहान ४ बजेसम्म बन्द हुने प्रमुख जिल्ला अधिकारी हरी प्रसाद गैरेले बताउनुभयो ।
साथै उक्त सडक खण्ड बन्द गरी निर्माण कार्य गर्ने निर्णय भएकाले वैकल्पिक मार्ग प्रयोग गर्न समेत आग्रह गर्नुभयो ।
सडकको ७.७५ चौडाइ कालोपत्रे गरिंदैछ । अहिले भएको सडक निकै साँघुरो र कालोपत्रे पनि भत्किंदै गएको थियो । सडकखण्डको २३ किलोमिटरमा समान्तर इलाइट जेभीले निर्माण कार्य गर्दै आएको छ ।
२०८२ साल फागुन २५ गतेसम्म सम्पन्न गरिसक्नुपर्ने गरी २०७९ साल फागुन २८ गते सम्झौता भएको हो । एक अर्ब ५० करोड ४८ लाख ३२ हजार ९५९ रुपैयाँ लागतमा सडक स्तरउन्नतिका साथै कालोपत्रे गर्ने गरी ठेक्का सम्झौता भएको हो ।
सडकको २५ प्रतिशत भौतिक प्रगति र ११.५३ वित्तीय प्रगति भएको छ ।
