साबित्रा पौडेल , चैत ४ गुल्मी ।
गुल्मीको छत्रकोट गाउँपालिकामा संचालित स्वास्थ्य सम्बन्धी घुम्ती शिविर (महिला सम्बन्धी स्वास्थ्य शिविर ) सम्पन्न भएको छ । गत फागुन ३० गते दौघा स्वास्थ्य चौकी दौघाबाट सुरु गरिएको शिविर आज हुँगा स्वास्थ्य चौकी हुँगामा सम्पन्न भएको हो ।
गाउँपालिकाको स्वास्थ्य शाखाको आयोजनामा सम्पन्न शिविरमा १,५७४ जना महिला सम्बन्धी विभिन्न रोग भएका बिरामीले सेवा लिएका छन । जसमध्ये पहिलो दिन फागुन ३० गते दौघा स्वास्थ्य चौकी दौघामा सम्पन्न शिविरमा १४५ जना , चैत १ गते खर्ज्याङ्ग स्वास्थ्य चौकी खर्ज्याङ्गमा सम्पन्न शिविरमा २०६ जनाले सेवा लिएका थिए ।
यस्तै तेस्रो दिन अर्थात चैत २ गते हर्दिनेटा स्वास्थ्य चौकी हर्दिनेटामा सम्पन्न महिलासम्बन्धी स्वास्थ्य शिविरमा ३२८ जना बिरामी लाभान्वित भएका स्वास्थ्य शाखा प्रमुख श्याम सुन्दर पोखरेलले बताउनुभयो ।
चैत ३ गते बोखर सामुदायिक स्वास्थ्य इकाई दिगाममा सम्पन्न शिविरमा ४९४ जना र आज हुँगा स्वास्थ्य चौकी हुँगामा सम्पन्न शिविरमा ४०१ जनाले सेवा लिएका छन ।
आज पाठेघरको मुखको स्क्रिनीङ सेवा ५७ जना, लामो समयको गर्भान्तर ईम्प्लान्ट सेवा १० जना, आई.यु.सि.डि. सेवा १ जना, रिङ पेसरी सेवा २ जना, भि.डि.यो एक्सरे सेवा १३५ जना र महिला रोग सम्बन्धी सेवा १९६ जनाले लिएका स्वास्थ्य शाखा प्रमुख पोखरेलले बताउनुभयो ।
शिविरमा विभिन्न क्षेत्रमा कार्यरत अ.न.मी , अ.हे.व., हे.अ., सिनियर अ.न.मी , सि.अ.हे.व.अधिकृत ,ल्याव असिस्टेन्ट, स्थानीय सामुदायिक महिला स्वास्थ्य स्वयम् सेविका, स्वास्थ्य चौकीका प्रमुख लगायतले सेवा प्रदान गर्नुभएको थियो ।
शिविर संचालन अवधिभर शिविरको सहजिकरण सि.अ.हे.व. सपना टण्डनले गर्नुभएको थियो भने डाक्टर बिवेक विराट खनालले शिविरको बारेमा जानकारी गराउनुभएको थियो । शिविरमा विभिन्न वडाका जनप्रतिनिधि लगायतको पनि उपस्थिती पनि रहेको थियो ।
शिविरमा पाठेघरको मुखको क्यान्सर स्क्रिनिङ्ग सेवा , पाठेघर खसेका महिलाको लागि नि:शुल्क रिङ पेसरी सेवा , लामो समयको गर्भान्तरका लागि आई.यु.सि.डि. र ईम्प्लान्ट सेवा , महिलाहरूका लागि डाक्टरद्वारा नि:शुल्क जाँच र भिडियो एक्सरे सेवा लगायतका सेवा प्रदान गरिएको थियो ।
गाउँपालिकामा महिला सम्बन्धी विभिन्न रोग भएका बिरामीको सहजताको लागि शिविरको आयोजना गरिएको र आगामी दिनमा पनि यस्तै कार्यक्रमहरु ल्याउने स्वास्थ्य शाखा प्रमुख पोखरेलले बताउनुभयो ।
शिविर निकै उपयोगी बनेको तथा उत्साहजनक रुपमा सफल भएको उहाँको भनाई छ ।