साबित्रा पौडेल , चैत ४ गुल्मी ।
मदन भण्डारी राजमार्ग योजना कार्यलय , गुल्मी अन्तर्गत रिडी -तम्घास सडक खण्ड यही चैत ७ गतेदेखि दैनिक १२ घण्टा बन्द गरिने भएको छ । उक्त सडक खण्डको २५ किमी सडक क्षेत्रमा पहरो फोर्ने , ग्रेड मिलाउने लगायतका कार्य गर्नुपर्ने भएकाले रिडी -तम्घास सडक खण्ड बन्द गरिने भएको हो ।
जिल्ला प्रशासन कार्यालय गुल्मीको आज बसेको बैठकको निर्णय अनुसार रिडी -तम्घास सडक खण्ड बन्द गरिने भएकाले वैकल्पिक मार्ग (पानी ट्यांकी – थोर्गा – स्यालपोखरी – स्यालबिसौना देखी रातामाटा सडक, पिपलनेटा – दिगाम हुँदै रिडी , लुम्छा – धरमपानी – दिगाम हुदै रिडी , घुम्ती चारपाला – खर्ज्याङ्ग हुँदै रिडी जाने सडक खण्ड) को प्रयोग गर्न जिल्ला प्रशासन कार्यालय गुल्मीले आग्र्ह गरेको छ ।
उक्त बाटोमा वैकल्पिक व्यवस्था हुनेगरी समयमै कार्यसम्पन्न गर्ने प्रयोजनको लागि यहीँ चैत ७ गतेदेखि चैत मसान्तसम्मको लागि बन्द गर्न लागिएको जिल्ला प्रशासन कार्यालय गुल्मीले जनाएको छ ।
सडक बिहान १० बजेदेखि दिउँसो ४ बजेसम्म र राती १० बजेदेखि बिहान ४ बजेसम्म बन्द हुने प्रमुख जिल्ला अधिकारी हरी प्रसाद गैरेले बताउनुभयो ।
साथै उक्त सडक खण्ड बन्द गरी निर्माण कार्य गर्ने निर्णय भएकाले वैकल्पिक मार्ग प्रयोग गर्न समेत आग्रह गर्नुभयो ।
