रमेश विश्वकर्मा, पुस २२ गुल्मी।
गुल्मीको तम्घासमा सञ्चालन भएको निःशुल्क स्तन क्यान्सर परीक्षण तथा स्वास्थ्य सचेतना शिविरबाट २५१ जनाले सेवा लिनुभएको छ । डिल्ली माया मेमोरियल ब्रेस्ट क्यान्सर फाउन्डेसन काठमाण्डौको विशेषज्ञ सहयोगमा रोटरी क्लब अफ रेसुङ्गा गुल्मीद्वारा आयोजित शिविरमा महिला र पुरुषहरुले ब्रेस्ट क्यान्सरको परीक्षण गराउनुभयो ।
त्यसअवसरमा डिल्ली माया मेमोरियल ब्रेस्ट क्यान्सर फाउन्डेसनका संस्थापक अध्यक्ष विशेषज्ञ डाक्टर सञ्जय पाण्डेले विशेषज्ञ सेवा प्रदान गर्नुभयो । उहाँले स्तन क्यान्सरको वर्तमान अवस्थासहित स्तन क्यान्सर हुने सम्भावित कारण बारे जानकारी गराउनुभयो ।
स्तन क्यान्सरबाट हुन सक्ने जोखिमको उल्लेख गर्दै विशेषज्ञ डाक्टर पाण्डेले स्तन क्यान्सर उपचार उपलब्ध भएतापनि मानिसहरु समयमै उपचार केन्द्रसम्म नजानुका साथै रोगलाई लुकाउने र हेल्चेक्राई गर्ने गरेको बताउनुभयो ।
स्तन क्यान्सर सम्बन्धि सचेतना गर्नुका साथै स्तन क्यान्सरको स्क्रिनिङ्ग गरि संकास्पद बिरामीलाई उपचारको दायरामा ल्याउने उदेश्यले शिविर सञ्चालन गरिएको रोटरी क्लब अफ रेसुङ्गा गुल्मीका अध्यक्ष हरिकुमार श्रेष्ठले बताउनुभयो । शिविरमा सबैभन्दा बढी २४९ महिला र २ पुरुषले ब्रेस्ट क्यान्सरको परीक्षण गराउनुभयो ।