साबित्रा पौडेल , कार्तिक १३ गुल्मी ।
नेपालीहरूको दाेस्राे ठूलो चाड तिहारको भाइटीका आउन अब ५ दिनमात्र बाँकी छ । यति बेला गाउँघरमा ढकमक्क फुलेका सयपत्री र मखमली फूलको बास्नाले गाउँ नै मगमग बसाएको छ । सुन्दर तथा मनमोहक वातावरणले गाउँलाई थप आकर्षकयुक्त बनाएको छ । घर, आँगन, डिल, बारी, कान्ला र खोल्सा–खोल्सीमा फुलेका फूलहरूले तिहार नजिकिएको सङ्केत गर्दछ ।
यसै क्रममा तिहार पर्व भित्रिएसँगै गुल्मीको चन्द्रकोट गाउँपालिका– ८ मजुवामा रहेको तुराङ बहुप्राविधिक शिक्षालयको बगैचामा फूलहरू ढकमक्कै फुलेका छन् ।
विद्यार्थीलाई प्रयोगात्मक अभ्यास गराउने उद्देश्यअनुरूप कृषिसम्बन्धी अभ्यास गराइ स्थानीय उत्पादनलाई प्रोत्साहित गर्ने उद्देश्यले शिक्षालयले भाडामा लिएको १० रोपनी जग्गामध्ये ३ रोपनी भन्दा बढि क्षेत्रफलमा सयपत्री, मखमली फूल खेती गरिएको रोपनी क्षेत्रफलमा तिहारका लागि विभिन्न प्रजातिका फूल फुलेका छन ।
बगैँचामा उत्पादन भएको फूलको माग अत्यधिक रहेको तथा अहिले एक क्विन्टलभन्दा धेरै फूलको माग भइसकेको शिक्षालयले जनाएको छ ।
शिक्षालयमा शिक्षालयका प्रशिक्षक तथा कर्मचारी र तीनवर्षे डिप्लोमा कृषिबाली विज्ञान अध्ययन गर्ने विद्यार्थीहरुको सहयोगमा तिहारलाई लक्षित गरेर फुल रोपिएको थियो ।