सुदर्शन पन्थ, पुस १२ गुल्मी ।
गुल्मी जिल्लामै पहिलो पटक जिपलाइन सञ्चालनमा आएको छ। जिल्लाको छत्रकोट गाउँपालिकामा निर्माण गरिएको साहसिक खेल जिपलाइनको आज एक भव्य समारोहका बिच उद्घाटन गरिए सँगै जिल्ला मै पहिलो जिपलाइन सञ्चालन भएको हो ।
“रुरु रेसुङ्गाको धार्मिक आस छत्रकोटमा बसौं बास” भन्ने मुल नाराका साथ पर्यटकीय गन्तव्य बनाउने उद्देश्यका साथ निर्माण गरिएको जिपलाइनको जिल्ला समन्वय समितिका प्रमुख सहितका पदाधिकारी , जिल्ला भित्रका सम्पुर्ण पालिकाका प्रमुख , उपप्रमुख, प्रमुख प्रशासकीय अधिकृत , पालिका भित्रका कर्मचारी, छिमेकी जिल्ला अर्घाखाँचीको पाणिनी गाउँपलिकाका अध्यक्ष, स्थानीय, जन प्रतिनिधि, पत्रकार, सुरक्षाकर्मी लगायतको उपस्थितिमा उद्घाटन गरिएको हो ।
जिपलाइनको सामूहिक रूपमा उद्घाटन गर्दै गाउँपालिका अध्यक्ष रामप्रसाद पाण्डेले आर्थिक समृद्धि हासिल गरि समग्र जिल्लाको पर्यटन प्रवर्धनको विकास सँगै रोजगारी सिर्जना गर्ने उद्देश्यले पालिकाले जिपलाइन सञ्चालनमा ल्याएको बताउनु भयो ।
यस्तै उद्घाटन समारोहमा बोल्दै जिल्ला समन्वय समिती प्रमुख द्रोणबहादुर खत्रीले छत्रकोट गाउँपालिकाले गुल्मी जिल्लाले नै गौरव गर्न लायक कार्यको थालनी गरेको र छत्रकोट जिपलाइन समग्र जिल्लाकै पर्यटन विकासमा कोसेढुङ्गा बन्ने जिकिर गर्नु भयो ।
छत्रकोट जिपलाइनलाई राष्ट्रिय गौरवको विषय बनाउन लुम्छा बजारभरी राष्ट्रिय झन्डा फहराइएको थियो ।
पर्यटकीय गन्तव्य बनाउने उद्देश्यले छत्रकोट देवालय मन्दिरबाट देवी भगवती मन्दिरसम्म पुग्नेगरी जिपलाइन निर्माण गरिएको छ। अघिल्लो आर्थिक वर्षबाट निर्माण सुरु भएको जिपलाइनको आजबाट औपचारिक सुरुवात भएको हो ।
जिपलाइन निर्माणको लागि लुम्बिनी प्रदेश सरकार र छत्रकोट गाउँपालिकाको समपूरक बजेटबाट रु. १ करोड ३७ लाख ४५ हजार १७७ रुपैयाँ अनुमानित लागतमा २०८२ जेठ ३० गतेसम्म सम्पन्न गर्ने गरी २०८० चैत २७ गते सानुदेवी कन्स्ट्रक्सन प्रालीसँग ठेक्का सम्झौता भएकोमा त्यसअघि नै ८६ लाख ७३ हजार १४४ रुपैयाँ लागतमा निर्माण कार्य सम्पन्न भएको हो ।
१ हजार ८० मिटर लम्बाई रहेको जिपलाइनको ६७ मिटरको उचाइ रहेको छ ।
जिपलाइनमा औसत १५ देखि २० मिटर प्रतिसेकेन्डमा तौल अनुसारको गति रहेको छ । सुरु स्टेशनदेखि ल्याडिन्ङ हुने स्टेशनसम्म पुग्न अधिकतम ५५ देखि ७७ सेकेन्ड समय लाग्छ ।
जिपलाइन चढ्नका लागि गाउँपालिका भित्रका स्थानीयका लागि ४ सय, विद्यार्थीहरूका लागि ३ सय, पालिका बाहिरका नागरिकको लागि ५ सय र विदेशी नागरिकको लागि १ हजार ५ सय रुपैयाँ शुल्क निर्धारण गरिएको छ ।
गाउँपालिकाको छत्रकोट देवालय मन्दिरमा अहिले पनि दैनिक सयौं नागरिक मन्दिर अवलोकन र बनभोजका लागि पुग्ने गर्छन् । छत्रकोट देवालयमा आएका पर्यटकलाई देवी भगवती मन्दिरसम्म पुर्याउन जिपलाइनले ठूलो भुमिका खेल्ने छ ।
उद्घाटन सत्रको कार्यक्रम पत्रकार भुवन भुसालले सञ्चालन गर्नु भएको थियो ।