साबित्रा पौडेल, पुष १० गुल्मी ।
गुल्मीको छत्रकोट गाउँपालिकामा नवनिर्मित छत्रकोट जिपलाइनको निर्माण कार्य सम्पन्न भएको छ।
जिपलाइनको छत्रकोट देवालय मन्दिर परिसरमा स्टेसन रहेको छ भने गाउँपालिकाको वडा नम्बर ३ देवी भगवती मन्दिर परिसरमा ल्यान्डिङ हुनेछ ।
जीप लाइनको शुक्रबार एक औपचारिक कार्यक्रमका साथ उद्घाटन गरिने गाउँपालिका अध्यक्ष रामप्रसाद पाण्डेले आज पत्रकार सम्मेलन मार्फत जानकारी दिनुभयो ।
जिपलाइन निर्माणको लागि लुम्बिनी प्रदेश सरकार र छत्रकोट गाउँपालिकाको समपूरक बजेटबाट रु. १ करोड ३७ लाख ४५ हजार १७७ रुपैयाँ अनुमानित लागतमा ठेक्का सम्झौता गरी ८६ लाख ७३ हजार १४४ रुपैयाँ लागतमा निर्माण कार्य सम्पन्न गरिएको छ।
२०८२ जेठ ३० गतेसम्म सम्पन्न गर्ने गरी २०८० चैत २७ गते सानुदेवी कन्स्ट्रक्सन प्रालीसँग सम्झौता भएकोमा त्यसअघि नै निर्माण सम्पन्न भएको उहाँको भनाइ छ।
९६० मिटर सोझो दूरी रहेको जिपलाइनको १०८० मिटर लम्बाइ तथा ६७ मिटर उचाइमा रहेको छ।
जिपलाइनको औसत गति १५ देखि २० मिटर प्रतिसेकेन्ड तथा सुरु स्टेसनदेखि ल्यान्डिङ हुने स्टेसनसम्म पुग्न लाग्ने अधिकतम समय ५५ देखि ५७ सेकेन्डमा तौल अनुसारको फरक पर्न सक्ने गाउँपालिकाका प्रमुख प्रशासकीय अधिकृत रुद्र पुरीले बताउनुभयो।
नगरकोट जिपलाइन प्रालीको दुईजना दक्ष प्राविधिकहरूद्वारा स्थानीय तीनजना र नगर प्रहरी दुईजना गरी पाँच जनालाई १२ दिनको तालिम प्रदान गरी नियमित रूपमा सञ्चालन गर्न लागिएको जिपलाइन चढ्नको लागि छत्रकोट गाउँपालिका बासीहरूको लागि नगद रु. ४०० विद्यार्थीहरूको लागि नगद रु. ३०० छत्रकोट गाउँपालिकाभन्दा बाहिरका नेपाली नागरिकको लागि रु. ५०० र विदेशी नागरिकको लागि रु. १,५०० शुल्क निर्धारण गरिएको गाउँपालिका अध्यक्ष पाण्डेले जानकारी दिनुभयो ।