सुदर्शन पन्थ, चैत २ गुल्मी ।
देश विकासको एक महत्त्वपूर्ण माध्यम हो शिक्षा , शिक्षाको क्षेत्रमा छत्रकोट गाउँपालिका अब्बल छ । शिक्षालाई अझ अब्बल बनाउन र विद्यार्थी प्रोत्साहनको लागि छत्रकोट गाउँपालिकाले नयाँ योजना बनाएको छ ।
छत्रकोट गाउँपालिका अन्तर्गतको शिक्षा समितिको बैठकको निर्णय अनुसार २०८१ सालको एस.ई.ई परिक्षादेखी उत्कृष्ट नतिजा ल्याउने विद्यार्थीहरुलाई गाउँपालिकाले नगद पुरस्कारले सम्मान गर्ने भएको हो ।
एस.ई.ई दिने विद्यार्थीलाई प्रोत्साहन गर्ने उदेश्यले नगद पुरस्कारले सम्मान गर्ने निर्णय गरेको गाउँंपालिकाको शिक्षा शाखाले जनाएको छ । बैठकको निर्णय अनुसार पालिका भित्रका एस.ई.ई. मा ४ जिपिए ल्याउने विद्यार्थीले नगद १ लाख ५१ हजार पुरस्कार पाउने छन् ।
यस्तै ३.९० देखि ३.९९ सम्म जिपिए ल्याउने विद्यार्थीले नगद ५१ हजार र ३.८ देखि ३.८९ सम्म जिपिए ल्याउने नगद २५ हजार पुरस्कार पाउने भएका हुन। पालिकाको यो निर्णयले छत्रकोट भित्रका विद्यार्थी प्रोत्साहनमा ठूलो भुमिकाले खेल्ने यस क्षेत्रका शिक्षाप्रेमीहरुको बुझाइ छ।