रमेश विश्वकर्मा, पुस १८ गुल्मी ।
गुल्मीमा रुख काट्नेक्रममा एक जना व्यक्ति घाइते हुनुभएको छ । जिल्लाको रेसुङ्गा नगरपालिका–१४ रातामाटाका ५२ वर्षीय पूर्णबहादुर पचभैया घाइते हुनुभएको जिल्ला प्रहरी कार्यालय गुल्मीका डिएसपी डिल्लीनारायण पाण्डेले जानकारी दिनुभयो ।
डिएसपी पाण्डेका अनुसार आज बुधबार बिहान करिब ९ः३० बजेको समयमा घाइते पचभैयालाई आफ्नै भाइ भोजबहादुर पचभैयाले सल्लाको रुख (ढाल्ने) काट्ने क्रममा रुखमा बाँधेको डोरीले उछिट्याएपछि उहाँ घाइते हुनुभएको बुझिएको छ ।
डोरीले उछिट्याउँदा करिब १२ फिट तल सडकमा खसेर घाइते हुनुभएको छ । जिल्ला अस्पताल तम्घासमा उपचारपछि भैरहवा मेडिकल कलेजमा रिफर हुनुभएका घाइते पचभैयाको छातीको बायाँतर्फको पाँच वटा करङ र बायाँतर्फको हिपको हड्डी फ्याक्चर भएको बताइएको छ । उहाँको स्वास्थ्य अवस्था मध्यम रहेको डिएसपी पाण्डेले बताउनुभयो ।