कात्तिक १६ गुल्मी, विश्वनाथ पाण्डे/ नेकपा एमाले रुरुक्षेत्र गाउँपालिका वडा नं. ५ का वडा कमीटी अध्यक्ष पदमलाल श्रेष्ठको निधन भएको छ ।
जण्डिस तथा निमोनियाबाट ग्रस्त श्रेष्ठको उपचारका क्रममा गएराती निधन भएको हो । केही दिनअघि देखिएको सामान्य ज्वरो र निमोनिया बढ्दै गएपछि उहाँलाई लुम्बिनी प्रादेशिक अस्पताल बुटवलमा भर्ना गरिएको र उपचारका क्रममा निधन भएको पारिवारिक श्रोतले जनाएको छ ।
गत स्थानीय तहको निर्वाचनमा रुरुक्षेत्र गाउँपालिका वडा नं. ५ मा एमालेको तर्फबाट उमेद्धवार बनेका श्रेष्ठ राजनीतीक तथा सामाजिक क्षेत्रमा सक्रिय हुनुहुन्थ्यो ।
बी एण्ड बी युथ क्लबका उपाध्यक्ष तथा युवा व्यवसायी वसन्त श्रेष्ठले स्मरण गर्दै भन्नुभयो “युवा उद्यमी तथा सफल व्यवसायीको छवि बनाएका श्रेष्ठको अप्रत्याशित निधनले ठूलो सामाजिक क्षति व्यहोर्नुपरेको छ” ।
उहाँका अनुसार शोकमा परेको बलेटक्सार बजार बन्द छ ।
दिवगंत श्रेष्ठ बी एण्ड बी युथ क्लबका सचिव, शुभ रेसुङ्गा ट्रेडिङ् प्रा.लि. का संस्थापक अध्यक्ष, रेडियो श्रृङ्गेश्वर एफ् एम् का संस्थापक सदस्य, रेसुङ्गा इन्भेष्टमेण्ट प्रा.लि का संस्थापक सदस्य, रुरु रेसुङ्गा यातायात प्रा. लि. का पूर्व कोषाध्यक्ष र शुभ रेसुङ्गा पार्टी प्यालेसको संस्थापक अध्यक्षका रुपमा काम गर्नुभएको थियो ।
सानै उमेरमा समुहगत काम गर्न र संगठन परिचालनमा विशेष कौशल देखाएका श्रेष्ठका घरमा अहिले समवेदना तथा सहानुभुति प्रकट गर्ने आफन्तजन र शुभेच्छुकको घुइँचो लागेको नेकपा एमाले रुरुक्षेत्र गाउँकमिटी सदस्य दुर्गा घायलले बताउनुभयो ।
श्रेष्ठको आजै रिडीमा अन्तेष्टि गर्ने तयारी छ ।