चैत १९, पाल्पा ।
नेपाल विद्यालय कर्मचारी परिषद्को पाल्पा जिल्लाको जिल्ला परिषद् भेला भव्यरूपमा सम्पन्न भएको छ ।
जिल्ला कार्यसमितिका अध्यक्ष श्रीधर प्रसाद पाण्डेको सभाध्यक्षतामा सम्पन्न कार्यक्रममा अध्यक्षले वार्षिक गतिविधिको प्रतिवेदन पढेर सुनाउनु भएको थियो ।
अध्यक्ष पाण्डेले २०७९ र ०८० सालको कर्मचारी आन्दोलनको उपलब्धिका रूपमा रहेको विद्यालय शिक्षासम्बन्धी कानुनलाई संशोधन र एकीकरण गर्न बनेको विधेयक–२०८० संसदबाट प्रतिनिधिसभा अन्तर्गतको शिक्षा, स्वास्थ्य तथा सूचना प्रविधि समितिमा पुगेको बताए।
उक्त विधेयक हाल विचाराधीन छ। पाण्डेले विद्यालय कर्मचारीसँग सरकारले गरेका सहमति अक्षरसः समेटेर विधेयकलाई ऐनको रूपमा ल्याउन माग गरे। अन्यथा पाल्पा जिल्लाबाटै दबाबमूलक आन्दोलन सुरुवात गर्ने चेतावनी दिए। त्यसका लागि तयारी अवस्थामा रहन पनि उनले आमविद्यालय कर्मचारीलाई अनुरोध गरे।
२०४७ साल फागुन २६ गते जिल्ला प्रशासन कार्यालय काठमाडौँमा दर्ता भई राष्ट्रिय समितिले सामुदायिक विद्यालयका कर्मचारीहरूको पेसागत समस्याबारे सम्बन्धित निकायको ध्यानाकर्षण तथा समाधान गर्दै आएको छ।
जिल्ला परिषद्को अवसरमा राष्ट्रिय समितिका अध्यक्ष गंगाराम तिवारीले शुभकामना दिएका छन्। ,‘सम्पूर्ण विद्यालय कर्मचारी मित्रहरू। २०४७ सालमा स्थापना भएको साझा संस्था, सम्पूर्ण विद्यालय कर्मचारीहरूको आशावादी संस्था रहदै आएकोछ ‘ उनले बताए
कार्यक्रमको सञ्चालन जिल्ला सचिव युवराज पौडेलले गरेका थिए भने पालिका कमिटी अध्यक्ष तथा पदाधिकारीहरू एवम् जिल्ला कमिटीका अध्यक्षले आफनो पालिकाको वार्षिक गतिविधि प्रस्तुत गरेका थिए । कार्यक्रममा पालिका पदाधिकारी एवम् सदस्यहरूको सहभागीता रहेको थियोे ।
