साबित्रा पौडेल, मंसिर १२ गुल्मी : देउसी भैलो खेल्ले अधिकांशले संकलन भएको पैसा पिकनीक र मोजमस्तीमा खर्च गर्छन्।
तर, न्यु सनराईज युवा क्लब छत्रकोट ३ नरम गुल्मीले तिहारमा देउसी भैलो खेलेर संकलन गरेको रकम मोटरसाईकल दुर्घटनामा परी घाईते भएको फर्स बहादुर खासुलाई सहयोग गरेको छ।
क्लबले देउसी भैलोबाट उठेको रकम मध्ये २०,००० रुपैयाँ रुपन्देहीमा मोटरसाईकल दुर्घटनामा परी घाईते भएका खासुको उपचारको लागी उहाँको घरपरिवारलाई हस्तान्तरण गरेको हो।
दुर्घटनामा परी घाईते खासु काठमाडौँ स्थित मेडिसिटी अस्पातलमा उपचार भईरहेको छ। उहाँ गत कार्तिक ३० गते रुपन्देहीमा मोटरसाईकल दुर्घटनामा पर्नु भएको थियो।
साथै, क्लबले प्राणघातक रोगहरु, मृगौला पीडित तथा अचानक दुर्घटनामा परी बिरामी तथा घाईते भएकालाई प्रत्येक बर्ष देउसी भैलो कार्यक्रमबाट जम्मा भएको रकममध्ये २५ प्रतीशत रकम सहयोग गर्दै आएको क्लबका अध्यक्ष्य खिम बहादुर खासुले बताउनु भयो।