असार ०९,गुल्मी/कपिल गौतम:
जिल्लाको रुरुक्षेत्र गाउँपालिकाले माध्यमिक शिक्षा परिक्षा २०७९ मा उत्कृष्ट नतिजा ल्याउने विद्यालयका शिक्षक एवं विद्यार्थीहरुलाई सम्मान कार्यक्रम सम्पन्न गरेको छ। आइतबार गाउँपालिकाको सभाहलमा एक विशेष कार्यक्रमको आयोजना गरि उक्त कार्यक्रम सम्पन्न गरिएको हो।
कार्यक्रममा एसईई २०७९ मा समग्र गाउँपालिका प्रथम, द्वितीय, तृतीय हुने विद्यार्थी र सामुदायिक विद्यालय तर्फ गाउँपालिका प्रथम, द्वितीय र तृतीय हुने विद्यार्थी सङ्गै ३.६ जिपिए वा सो भन्दा माथि ल्याउने विद्यार्थीहरुलाई सम्मान गरिएको गाउँपालिकाका शिक्षा शाखा प्रमुख तेजबहादुर कुमालले जानकारी दिएका छन् ।
समग्रमा ३.९५ जिपिए सहित गाउँपालिका प्रथम हुने रेन्बो बोर्डिङका निरज श्रेष्ठ, ३.८५ जिपिए सहित गाउँपालिका द्वितीय हुने ज्ञवा माविकि छात्रा सलिना ज्ञवाली, रेन्बो बोर्डिङका मुकेश ज्ञवाली र रेन्बो बोर्डिङकै कनिशा श्रेष्ठ सम्मानित भएका हुन् भने ३.८४ जिपिए सहित तेस्रो हुने जनबोध माविकी छात्रा अंशु ज्ञवाली सम्मानित भएकि छन् ।
यता सामुदायिक विद्यालयतर्फ प्रथम द्वितीय र तृतीय हुने विद्यार्थीहरु पनि सम्मानित भएका छन् । ३.८५ जिपिए सहित सामुदायिक विद्यालय तर्फ प्रथम तथा समग्र गाउँपालिकामा दोस्रो हुन सफल ज्ञवा माविकी छात्रा सलिना ज्ञवाली सम्मानित भएकी छन् भने यता जनबोध माविका प्राविधिक धारतर्फका ३.८४ जिपिए सहित दोस्रो हुन सफल छात्रा अंशु ज्ञवाली र प्राविधिक धारतर्फकै ३.८ जिपिए सहित तृतीय हुन सफल परिक्षा ज्ञवाली पनि सम्मानित भएकी छन् ।
त्यस्तै गाउँपालिकाले २०७९ सालको माद्यामिक परिक्षा एसईईमा ३.६ वा सो भन्दा माथी जिपिए ल्याउने सम्पुर्ण विद्यार्थीहरुलाई सम्मानित गरेको छ। यसरी जम्मा १६ जना विद्यार्थीहरु सम्मानित हुन सफल भएका शिक्षा शाखा प्रमुख कुमालले बताए।
त्यस्तै गाउँपालिकाले उक्त उत्कृष्ट नतिजा ल्याउन अहोरात्र खट्ने विभिन्न विद्यालयका शिक्षकहरुलाई पनि सम्मानित गरेको छ।
विभिन्न विषय अध्यापन गर्ने विभिन्न विद्यालयका कुल १३ जना शिक्षक सम्मानित भएको उनको भनाई रहेको छ भने गत वर्ष सम्पन्न राष्ट्रपति रनिङ शिल्डमा उत्कृष्ट हुन सफल विभिन्न विद्यालयका १३ जना विद्यार्थीहरुलाई पनि सम्मानित गरिएको शिक्षा शाखा प्रमुख कुमालको भनाइ रहेको छ।
कार्यक्रममा बोल्दै गाउँपालिका अध्यक्ष एवं कार्यक्रमका प्रमुख अतिथि यदु ज्ञवालीले उत्कृष्ट हुन सफल सम्पुर्ण विद्यार्थी एवं सम्मानित शिक्षकहरुलाई बधाई दिँदै आगामी दिनहरुमा पनि अझ उत्कृष्ट नतिजाको लागि शुभकामना दिदै शिक्षक एवं विद्यार्थीहरुलाई प्रोत्साहन दिएका छन् ।
उनले आगामी दिनमा अझ राम्रो नतिजा ल्याएर गाउँपालिकामा मात्र नभएर समग्र देशमै उत्कृष्ट नतिजा ल्याउनेगरि पठनपाठन संचालन गर्न अनुरोध समेत गरेका छन् ।
शिक्षक एवं विद्यार्थीहरुमा रहेका र भोगेका समस्या समाधानमा गाउँपालिकाले कुनै कसुर नराख्ने बताउँदै ढुक्क साथ गुणस्तरीय पठनपाठनमा सक्रिय हुन अनुरोध गरेका छन् ।
कार्यक्रमको संचालन शिक्षा शाखा प्रमुख तेजबहादुर कुमालले गरेका थिए।