सुदर्शन पन्थ, पुस ५ गुल्मी ।
गुल्मीको रुरु क्षेत्र गाउँपालिकाको वडा नं ५ बम्घाले राष्ट्रिय परिचय पत्र वितरण गर्ने भएको छ।
गाउँपालिकाले एक सूचना जारी गर्दै गाउँपालिकामा जिल्ला प्रशासन कार्यालय गुल्मीबाट राष्ट्रिय परिचय पत्रको विवरण संकलन गर्न खटिएको टोलिबाट संकलन गरिएको विवरणबाट तयार भएको राष्ट्रिय परिचय पत्र मङ्सिर ७ गते देखि वडा नं. ५ बाट वितरण गरिने जानकारी दिएको हो।
राष्ट्रिय परिचय पत्र लिनको लागि राष्ट्रिय परिचय पत्र विवरण संकलनको समयमा उपलब्ध गराईएको निस्सा र राष्ट्रिय परिचय पत्रको विवरण संकलन गर्दा दिइएको निस्सा नभएमा नेपाली नागरिकताको सक्कल प्रमाण पत्र सहित वडा कार्यालयमा स्वयं व्यक्ति उपस्थित हुनुपर्ने गाउँपालिकाका प्रमुख प्रशासकीय अधिकृत लक्ष्मण पाण्डेले बताउनु भयो।
साथै विगतमा राष्ट्रिय परिचय पत्रको लागि आफ्नो विवरण संकलन गराउन छुटेका नागरिकहरुको विवरण संकलन समेत गरिने भएकोले नेपाली नागरिकताको सक्कल प्रमाण-पत्र, पति/पत्निको नागरिकताको सक्कल प्रमाण पत्र/ नागरिकतामा पतिको नाम नभएमा विवाह दर्ता प्रमाण पत्र, बुवा/आमाको नागरिकताको प्रमाण पत्र, बसाई सराई गरेर आएको भए बसाई सराईको सक्कल प्रमाण पत्र सहित उपस्थित हुन अनुरोध गरिएको छ।
वडा कार्यालयले मङ्सिर ७ गतेदेखि १३ गतेसम्म साविकको वडा बमोजिम कार्यतालिका बनाएर परिचय पत्र वितरण गर्ने भएकोले वडाको सम्पर्क नं मा सम्पर्क गरि जानकारी लिन अनुरोध गरिएको छ ।
परिचय पत्र विहान १० बजे देखि अपरान्ह ४ बजे सम्म वितरण हुने छ। साथै अन्य वडाहरुमा क्रमश वितरण हुने कार्यक्रम भएकोले सूचना पछी प्रकाशन गरिने पालिका अध्यक्ष यदु ज्ञवालीले बताउनु भयो।
कार्ड वितरण तथा विवरण संकलन कार्यमा जनप्रतिनिधि, राजनीतिक दल, टोल विकास संस्था तथा विभिन्न संघ संस्थाहरुलाई आवश्यक सहयोग तथा समन्वय गरिदिन पालिका अध्यक्ष ज्ञवालीले अनुरोध गर्नुभएको छ।