मंसिर १५, गुल्मी।
मंगलबार शल्यक्रियामार्फत बच्चा जन्माएपछि सिद्धार्थ बाल तथा महिला अस्पताल बुटवलमा मृत्यु भएकी गुल्मीकी ३२ वर्षीया भवानी राष्कोटी मगरको शव चार दिनपछि आज उठेको छ। चार दिनसम्म मृतकका आफन्त, स्थानीय प्रशासन, बुटवल उपमहानगरपालिका, अस्पताल प्रशासन र नेपाल चिकित्सक संघका पदाधिकारीबीच भएको छलफलपछि शव उठाउने सहमति भएको हो।
मृतकका आफन्त, स्थानीय प्रशासन, बुटवल उपमहानगरपालिका र नेपाल चिकित्सक संघका पदाधिकारीहरू बीचको सहमतिपछि शव उठाउने सहमति भएको रूपन्देहीका प्रमुख जिल्ला अधिकारी गणेश अर्यालले जानकारी दिनुभयो।
गुल्मीको सत्यवती गाउँपालिका ३ ठूलोलुम्पेक घर भई भैरहवा बस्दै आएकी राष्कोटी मगरको उपचारको क्रममा मृत्यु भएपछि अस्पतालको स्थिति तनावपूर्ण बनेको थियो।
अस्पतालमा उपचारको क्रममा राष्कोटीको मृत्यु भएपछि मृतकका आफन्तले क्षतिपूर्तिको माग गर्दै अस्पताल तोडफोड र चिकित्सकमाथि कुटपिट गरेपछि विवाद उत्पन्न भएको थियो।
अस्पतालका मेडिकल सुपरिटेन्डेन्ट डा. राजेन्द्र बस्यालमाथि कुटपिट भएपछि प्रहरीले कुटपिटमा संलग्न सात जनालाई पक्राउ गरेको थियो भने मृतक राजकोटीको शव चार दिनसम्म शववाहनमै अस्पताल परिसरमा राखिएको थियो।
सहमतिका बुँदाहरुबारे अझै सार्वजनिक भइसकेको छैन ।